საქართველოს დამოუკიდებლობის დღე ქართველი ხალხისთვის თავისუფლების, სახელმწიფოებრიობის, ეროვნული ერთიანობისა და განვითარების სიმბოლოს წარმოადგენს. 26 მაისი არა მხოლოდ ქვეყნის ისტორიული გამარჯვებისა და დამოუკიდებლობის აღდგენის თარიღია, არამედ იმ ღირებულებების გამოხატულებაა, რომლებზეც თანამედროვე საქართველო შენდება — თავისუფლება, პროგრესი, პასუხისმგებლობა და მომავლისკენ სწრაფვა. სწორედ ამ მნიშვნელოვანი თარიღის აღსანიშნავად, თელავში, ერეკლე II-ის მოედანზე, მრავალფეროვანი კულტურულ-საგანმანათლებლო და შემეცნებითი აქტივობებით დატვირთული ღონისძიებები გაიმართა.
საქართველოს გაზის ტრანსპორტირების კომპანია, გენერალური დირექტორის დავით ვარდიაშვილის ხელმძღვანელობით, დამოუკიდებლობის დღისადმი მიძღვნილ ღონისძიებაში ენერგეტიკული სექტორის სხვა წარმომადგენლებთან ერთად მონაწილეობდა. კომპანიის ჩართულობა მიზნად ისახავდა საზოგადოებისათვის ენერგეტიკული ინფრასტრუქტურის მნიშვნელობის, ქვეყნის ენერგეტიკული უსაფრთხოების უზრუნველყოფაში მისი როლისა და ბუნებრივი გაზის სისტემის განვითარების მიმართულებით განხორციელებული მასშტაბური პროექტების გაცნობას. ღონისძიებას ესწრებოდა საქართველოს ეკონომიკისა და მდგრადი განვითარების მინისტრის მოადგილე, ქალბატონი ინგა ფხალაძე, რომელმაც სტუმრებს ენერგეტიკული სფეროს მიმდინარე და სამომავლო ინიციატივები წარუდგინა, მათ შორის საქართველოს გაზის ტრანსპორტირების კომპანიის მიერ წარმოდგენილი ექსპოზიციები და შემეცნებითი აქტივობები.
საქართველოს გაზის ტრანსპორტირების კომპანიის საგამოფენო სივრცის ერთ-ერთი მთავარი ელემენტი იყო საქართველოს მაგისტრალური გაზსადენების მასშტაბური ვიზუალური რუკა, რომელიც ქვეყნის ენერგეტიკული ინფრასტრუქტურის სრულ სურათს წარმოადგენდა. რუკაზე ასახული იყო როგორც საქართველოს შიდა მაგისტრალური გაზსადენების ქსელი, ასევე საერთაშორისო მნიშვნელობის ტრანზიტული გაზსადენები, რომლებიც ქვეყანას რეგიონულ ენერგეტიკულ დერეფანში მნიშვნელოვან ფუნქციას ანიჭებს. აღნიშნულმა ექსპოზიციამ დამთვალიერებლებს საშუალება მისცა უკეთ გაცნობოდნენ იმ ფართომასშტაბიან სისტემას, რომლის გამართული და უსაფრთხო ფუნქციონირება ყოველდღიურად უზრუნველყოფს მოსახლეობისა და ეკონომიკის სხვადასხვა სექტორის ენერგომომარაგებას.
ღონისძიების ფარგლებში განსაკუთრებული ყურადღება დაეთმო ბუნებრივი გაზის, როგორც შედარებით ნაკლებემისიური ენერგორესურსის, მნიშვნელობის წარმოჩენას. სპეციალურად მოწყობილ საინფორმაციო სივრცეში სტუმრებს შესაძლებლობა ჰქონდათ მიეღოთ ინფორმაცია ბუნებრივი გაზის როლის შესახებ ენერგეტიკული უსაფრთხოების, ეკონომიკური განვითარების, გარემოზე ზემოქმედების შემცირებისა და მოსახლეობის ცხოვრების ხარისხის გაუმჯობესების მიმართულებით. ასევე წარმოდგენილი იყო ინფორმაცია ენერგეტიკის მომავლის, განახლებადი ენერგიის წყაროებისა და ენერგეტიკული გარდაქმნის პროცესების შესახებ.
საქართველოს გაზის ტრანსპორტირების კომპანიის მიერ მოწყობილ საგანმანათლებლო სივრცეში ასევე მნიშვნელოვანი ადგილი დაეთმო უსაფრთხოების კულტურის პოპულარიზაციასა და ბავშვთა ცნობიერების ამაღლებას. სპეციალურად შექმნილი ინტერაქტიული სახლის მაკეტის მეშვეობით, პატარა სტუმრები გასართობ და შემეცნებით გარემოში ეცნობოდნენ ბუნებრივი გაზის უსაფრთხო მოხმარების ძირითად წესებს. პრაქტიკული და ვიზუალური აქტივობები ბავშვებს შესაძლებლობას აძლევდა თავად მიეღოთ მონაწილეობა სხვადასხვა დავალებაში და უკეთ გაეაზრებინათ უსაფრთხოების მნიშვნელობა ყოველდღიურ ცხოვრებაში.
